ئه‌نجوومه‌نى وه‌زیران داوا لە عێراق دەکات قەرەبووی هەڵەبجە بکاتەوە

0
9

ئەنجوومەنی وەزیران: خزمەتکردنی زیاتری خەڵکی هەڵەبجە ئەرکی سەرەکیمانە

رووداو – هەولێر

ئه‌نجوومه‌نى وه‌زیرانی هەرێمی کوردستان لە 31ـەمین ساڵرۆژی کیمیابارانی هەڵەبجە پەیامێکی بڵاوکردەوە و داوا دەکات حکومەتی عێراق قەرەبووی ماددی و مەعنەوی هەڵەبجە بکاتەوە.

ئەنجوومەنی وەزیران لە پەیامەکەیدا دەڵێ چاوەڕوانین لە حکومەتی عێراق ئەرکی یاسایی و ئەخلاقی خۆی دەرهەق بەم پارێزگایە و دانیشتووانەکانی لە هەموو جۆرە بایەخپێدانێک جێبەجێ بکات.

لەبارەی قوربانییانی کیمیابارانی هەڵەبجە، ئەنجوومەنی وەزیران دەڵێ “یادکردنەوەی ئەم کارەساتە جگە لەوەی رێزگرتنە لە قوربانیانی گەلەکەمان و مێژووی پڕ لە تێکۆشان و قوربانیدانمان، جەختکردنه‌وه‌ی حکومەتی هەرێمى كوردستانیشە لە بایەخدانی جددی بە ژیان و خزمەتکردنی برینداران و خانەوادە و کەسوکاری قوربانیانی چەکی کیمیایی و خزمەتکردنی زیاترى هەڵەبجەی ئازیز… وەک چۆن هەڵەبجەی شەهید سیمبولی ئازار و قوربانیی گەلەکەمانه‌، بە هەمان شێوەش سیمبولی خۆڕاگری و زیندووییمانە”.

دەقی پەیامى ئه‌نجوومه‌نى وه‌زیران له‌ ساڵیادی کیمیابارانی هەڵەبجه‌:

ئەمڕۆ سی و یەک ساڵ بەسەر کارەساتی کیمیابارانکردنی هەڵەبجەدا لەسەر دەستی ڕژیمی پێشووی عێراق تێدەپەڕێت کە وێڕای شه‌هیدبوونى پێنج هەزار هاووڵاتیی بێتاوان، هەزارانی دیکەش بریندار بوون و تا ئێستاش زۆربەیان بەدەست لێکەوته‌ و کاریگەرییە خراپە تەندروستی و دەروونییەکانی ئەو کارەساتەوە دەناڵێنن. ئەمە وێڕای ئاوارەبوونی هەزاران خێزان و وێرانکردن و تێکدانی ژینگەی ئەو دەڤەرە دڵگیرەی کوردستان.

یادکردنەوەی ئەم کارەساتە جگە لەوەی ڕێزگرتنە لە قوربانیانی گەلەکەمان و مێژووی پڕ لە تێکۆشان و قوربانیدانمان، جەختکردنه‌وه‌ی حکوومەتی هەرێمى كوردستانیشە لە بایەخدانی جددی بە ژیان و خزمەتکردنی برینداران و خانەوادە و کەسوکاری قوربانیانی چەکی کیمیایی و خزمەتکردنی زیاترى هەڵەبجەی ئازیز کە بێگومان کاری زۆر ماوە بۆیان بکرێت و حکوومەت بە پەرۆشەوە خزمەتی زیاتر و پێشکەشکردنی خزمەتگوزاریی باشتر بە پارێزگای هەڵەبجە و دانیشتوانە سەربەرزەکەی بە ئەرکی گرنگ و سەرەکیی خۆی دەزانێت.

چاوەڕوانیمان لە حکوومەتی عێراقیش بەجێگەیاندنی ئەرکی یاسایی و ئەخلاقیی خۆیەتی دەرهەق بەم پارێزگایە و دانیشتوانەکانی لە هەموو جۆرە بایەخپێدانێک له‌گه‌ڵ قەرەبووکردنەوەی ماددی و مەعنەویی خەڵکەک و ژینگەکەی، وەک قوربانیی دەستی دەوڵەتی عێراق.

وەک چۆن هەڵەبجەی شەهید سیمبولی ئازار و قوربانیی گەلەکەمانه‌، بە هەمان شێوەش سیمبولی خۆڕاگری و زیندووییمانە. قوربانیان و ئەو ئازیزانەمان کە لەم کارەساتە ناخهەژێنەدا لەدەستمان داون، هەمیشە لە یادمانن و تاهه‌تایه‌ لە ویژدانی ئەم گەلەدا یادیان زیندووە.

هەزاران سڵاو بۆ گیانی پاک و بێتاوانی شەهیدانی کیمیابارانی هەڵەبجەی ئازیز و سەرجەم شەهیدانی کوردستان.

ئه‌نجومه‌نى وه‌زیرانى هه‌رێمى كوردستان
16/3/2019
 

 

سه‌رچاوه‌

وه‌ڵام دانه‌وه‌

Please enter your comment!
Please enter your name here