ئوردن 15 تۆن هاوکاری بۆ ئاوارەکانی موسڵ گەیاندە هەولێر

0
338

هاوکارییەکان دەرمان و پێداویستی پزیشکین بۆ ئاوارەکانی موسڵ

رووداو – هەولێر

فڕۆکەیەکی هاوکاری حکومەتی ئوردنی هاشمی لە فڕۆکەخانەی نێودەوڵەتی هەولێر نیشتەوە، کە 15 تۆن دەرمان و پێداویستی پزیشکی لەخۆگرتبوو. کونسوڵی ئوردنیش لە هەولێر رایگەیاند، هاوکارییەکە بۆ ئەو نەخۆشخانانەی هەرێمی کوردستان و ناوچە کۆنترۆڵکراوەکانی موسڵە کە نەخۆش و بریندارەکانی موسڵیان لەخۆگرتوون.

هەیسەم ئەلفول، کونسوڵی ئوردن لە هەولێر لە کۆنگرەیەکی رۆژنامەڤانیدا رایگەیاند “دەستەی خێرخوازیی ئوردنی هاشمی 15 تۆن دەرمان و پێداویستی پزیشکی وەکو هاوکاری لەڕێگەی فڕۆکەیەکەوە نارد، کە بۆ نەخۆش و بریندارەکانی موسڵ دابینکراوە”.

ئەلفول گوتیشی “ئوردن هەردەم هەموو جۆرە پاڵپشتییەکی عێراقی کردووە، عێراقیش هەردەم هەڵوێستی باشی لە هەموو کات و بۆنەکاندا لەگەڵ ئوردندا هەبووە، ئەمڕۆش ئوردن ئەو هاوکارییەی بۆ عێراق و کوردستان رەوانەکردووە، کە بۆ ئەو نەخۆشخانانەی هەرێمی کوردستان و ناوچە کۆنترۆڵکراوەکانی موسڵە، کە نەخۆش و بریندارەکانی ئۆپەراسیۆنی رزگارکردنی موسڵیان لەخۆیان گرتووە”.

نەوزاد هادی، پارێزگاری هەولێر سوپاسی حکومەتی ئوردنی بۆ گەیاندنی ئەو هاوکارییانە و رایگەیاند “بە سوپاسەوە شانشینی ئوردن لە هاوکارییەکانی تایبەت بە باری ئاوارەکانی موسڵ، ئەمڕۆ 15 تۆن دەرمان و پێداویستی پزیشکی رەوانەی هەولێر کرد بۆ ئەوەی هاوکاری ئاوارەکانی موسڵی پێ بکرێت”.

نەوزاد هادی راشیگەیاند، حکومەتی ئوردن ئەمە جاری یەکەم نییە هاوکاری پێشکەش بە ئاوارەکان دەکات، بەڵکو جاری دیکەش هاوکاری پێشکەش بە هەرێمی کوردستان و ئاوارەکان کردووە. هاوکات تیمە پزیشکییەکانی وڵاتی ئوردن ماوەی دوو ساڵ دەبێت لە نەخۆشخانەی سەلاحەدین کاریان کردووە، تیمێکی دیکەشیان لە هەولێر هەبوو چەند خزمەتگوزارییەکی پێشکەش کرد.

داڕشتنەوە: حەکیم داود

سه‌رچاوه‌

وه‌ڵام دانه‌وه‌

Please enter your comment!
Please enter your name here