حیزبە کوردستانییەکان: گشتپرسی کەرکووک لەگەڵ هەرێمی کوردستاندا دەکرێت

0
358

حیزبە کوردستانییەکانی کەرکووک کۆبوونەوە 24-4-2017

رووداو – کەرکووک 

جگە لە بزووتنەوەی گوڕان سەرجەم حیزبە کوردستانییەکانی کەرکووک لەسەر ئاستی باڵا، دوو کاژێری تەواو گفتوگۆیان لەسەر مژارە گەرمەکان، بەتایبەتی ئەنجامدانی گشتپرسی کرد، دواجار گەیشتنە ئەو بڕوایەی کە ناکرێت بێ کەرکووک و ناوچە دابڕێنراوەکان گشتپرسی بۆ سەربەخۆیی ئەنجام بدرێت.

سەڵاح دەلۆ، سەرۆکی ئەنجوومەنی سەرکردایی پارتی لە کەرکووک ـ گەرمیان لە کۆنگرەیەکی رۆژنامەوانیدا رایگەیاند “زۆر جار باسی ئەوە دەکرێت کە ئایا ریفراندۆم کەرکووک و ناوچەکانی دەرەوەی ئیدارەی هەرێمی کوردستان دەگرێتەوە، بەڵێ کەرکووک و سەرجەم ئەو ناوچانە دەگرێتەوە، چونکە ئەمە راپرسییە و هەر تاکێکی کورد دەگرێتەوە جا لە هەر شوێنێکدا بێت”.

یەکێتی نیشتمانی کوردستان جەخت دەکاتەوە کە لە نەخشەڕێگەی یەکێتی بە روونی پشتگیریان لە ئەنجامدانی گشتپرسی کردوەو هاوڕان، کە نابێت کەرکووک و ناوچە دابڕێنەراوەکان بخرێتە دەرەوەی ئەو پرسە.
 
ئاسۆ مامەند، بەرپرسی مەڵبەندی دووی یەکێتی نیشتمانی کوردستان گوتی “کۆمیتە هاوبەشەکە پرسی ریفراندۆم دیاریدەکات، بەڵام بەدڵنیاییەوە کەرکووک سەرجەم ناوچە کوردستانییەکان دەبێ بەشداری ئەو ریفراندۆمە بکرێت، وەک یەکێتی نیشتمانی ئێستا و پێشووتریش تەئکیدمان لەسەر ریفراندۆم کردووەتەوە”.

بزووتنەوەی گۆڕان هۆکاری بەشداریی نەکردنیان لە کۆبوونەوەکە بۆ ئەوە دەگەڕێننەوە کە پارتی و یەکێتی  بەبێ راوێژ و پێشوەخەت بڕیار لەسەر پرسەکان دەدەن و پاشان بانگهێشتیان دەکەن.

ئەحمەد عەزیز، ئەندامی جڤاتی نیشتمانی بزووتنەوەی گۆڕان بە تۆڕی میدیایی رووداوی راگەیاند “یەکێتی و پارتی لەماوەی رابردوودا بڕیار و بەرنامەکانی خۆیان جێبەجێدەکەن و دواتر پرس و راوێژ بە لایەنە کوردستانییەکان دەکەن، ئەوان بڕیارەکانیان داوە و دێن تەنیا پەسەندی دەکەن، بۆیە ئێمە وەک بزووتنەوەی گۆڕان گەر بە کرداری بەشدار نەبین و دەورمان نەبێ لە بڕیارەکان ، ناچینە کۆبوونەوەیەک کە پێشتر بڕیارەکان درابێ و تەنیا پێمانی پەسەند بکەن”.

بیست رۆژ لەمەوبەر ئەنجوومەنی پارێزگای کەرکووک بەزۆرینەی دەنگ داوای لەحکومەتی عێراق کرد گشتپرسی بۆ یەکلاکردنەوەی چارەنوسی کەرکوووک ئەنجام بدات، بەڵام تاوەکو ئێستا بەغدا وەڵامی نەبووە. بۆیە چاوەڕوان دەکرێت بەیەک پاکێج لەگەڵ گشتپرسی سەربەخۆیی ئانجامبدرێت.

داڕشتنەوە: راوچی حەسەن 

سه‌رچاوه‌

وه‌ڵام دانه‌وه‌

Please enter your comment!
Please enter your name here