داعش لە چەند کاژێرێکدا 13 ئۆتۆمبێلی لە موسڵ تەقاندوونەتەوە

0
151

شەڕ لە گەڕەکەکانی سەحە، باب سنجار و زەنجەلی بەردەوامە

رووداو – موسڵ

دوایین قۆناخی ئۆپەراسیۆنی موسڵ لە 3 میحوەرەوە چەکدارانی داعش دەکاتە ئامانج، لە گەڕەکەکانی موسڵی کۆن، باب سنجار – سیحە – شیفا و زەنجەلی شەڕێکی قورس لەگەڵ چەکدارانی داعش دەستیپێکرد، بە گوتەی هێزە عێراقییەکان ئەم قۆناخەی ئۆپەراسیۆن یەکلاکەرەوەیە، کۆتایی بە دەسەڵاتی داعش دێنێ لە موسڵ. 

هێزی هاوپەیمانان هاوکارێکی بەهێزە لەگەڵ هێزە عێراقییەکان و ئەو پێگانەی داعش دەکاتە ئامانج کە رێگرن لە پێشڕەوی ئۆپراسیۆندا. 

چەکدارانی داعش شەڕی نەمان دەکەن، دەیانەوێ هەموو تەقەمەنی، بۆمب و خۆکوژەکان بتەقێننەوە تاکو جێپێیەکیان لە موسڵ بمێنێ، لە بەرەبەیانێکی زوەوە تا دەمەو نیوەڕۆ 13 ئۆتۆمبێل و 3 مۆتۆڕسکیلی بۆمبڕێژی داعش بە ئاسمانەوە تەقێنرانەوە بەر لەوەی بگەنە بەرەی شەڕی هێزەکانی عێراق. 

بە پێی هەندێ سەرچاوەی عێراق داعش منارەی حەدبا و مزگەوتی گەورە و زۆربەی ناوچەکەیان بۆمبڕێژ کردووە، عێراق مەرامیەتی منارەی حەدبا بێ زیانێکی وێرانکەر کۆنترۆڵکاتەوە تاوەکو وەک سیمبولێکی مێژوویی بە ساغی لە موسڵ بمێنێ، هاوکات عێراق دەیەوێ بە کۆنترۆڵکردنەوەی مزگەوتی نوری هەیبەتی خەلافەتی داعش بشکێنێ دوای ئەوەی لەو مزگەوتەدا ئەبوبەکر بەغدادی لە ناوەراستی 2014 دا خەلافەتی ئیسلامی راگەیاند.

بە پێی راپۆرتی نەتەوەیەکگرتوەکان نزیکەی 150 هەزار کەس لەو ناوچانەی شەڕدا ماون، خەڵک لە ژێر بۆردومان، شەڕ و برسێتییەکی مەترسیداردان، داعش بۆ قەڵغانی خۆی بەکاریان دێنێ. 

رۆژی هەینی فڕۆکەکانی عێراق نامەی هوشیاریان بۆ خەڵکی موسڵی کۆن خستە خوارەوە، داوا لە هاووڵاتیان کراوە خۆیان رزگار کەن هەڵبێن یان خۆیان پەنا بدەن تاوەکو بێزیان لە دوایین قۆناخی شەڕ قوتار بن. بەگوتەی فەرماندەکانی جەنگ تاکو 16ی رەمەزان موسڵ بە تەواوی لە داعش کۆنترۆڵ دەکرێتەوە.

پێداچوونەوە؛ عومەر شایان

سه‌رچاوه‌

وه‌ڵام دانه‌وه‌

Please enter your comment!
Please enter your name here