رووحانی: سوپای پاسداران ئاڵاهەڵگری بەرەنگاربوونەوەی تیرۆریزمە

0
299

سەرۆککۆماری ئێران لە رۆژی نیشتمانیی تەکنەلۆژیای ئەتۆمیی وڵاتەکەیدا بەتووندی رەخنەی لە ئەمریکا گرت
سەرۆککۆماری ئێران لە رۆژی نیشتمانیی تەکنەلۆژیای ئەتۆمیی وڵاتەکەیدا بەتووندی رەخنەی لە ئەمریکا گرت

رووداو – هەولێر 

سەرۆککۆماری ئێران لە رۆژی نیشتمانیی تەکنەلۆژیای ئەتۆمیی وڵاتەکەیدا بەتووندی رەخنەی لە ئەمریکا گرت و رایگەیاند، سوپاسی پاسداران ئاڵاهەڵگری بەرەنگاربوونەوەی تیرۆریزمە. 

رۆژی 20ی خاکەلێوە لە رۆژژمێری ئێراندا وەک رۆژی نیشتمانیی تەکنەلۆژیای ئەتۆمی ناونراوە و ئێران ئەمڕۆ 13ـەمین یادی ئەو بۆنەیە دەکاتەوە. حەسەن رووحانی، سەرۆککۆماری ئێران لە کاتێکدا لە تاران رێوڕەسمی رۆژی نیشتمانیی تەکنۆلۆژیای ئێرانی کردەوە، کە رۆژی رابردوو حکومەتی ئەمریکا ناوی سوپای پاسدارانی ئێرانی خستە لیستی تیرۆرەوە. 

ئەم بابەتە جیا لە پرسی تەکنۆلۆژیای ئەتۆمی بوو بە مژاری سەرەکیی لێدوانەکەی رووحانی لە رێوڕەسمەکەدا و بەتووندی رەخنەی لە ئەمریکا گرت سەبارەت بەو بڕیارە و پشتگیریی لە سوپای پاسداران کرد. 

رووحانی سوپای پاسدارانی بە ئاڵاهەڵگری بەرەنگاربوونەوەی تیرۆریزم ناوبرد و گوتی، ئەگەر سوپای پاسداران لەسەر داوای سووریا و عێراق کۆتایی بە داعش لەو وڵاتانە هێناوە کەچی ئەمریکا ئێستاش بەردەوامە لە داڵدەدانی سەرانی داعش. 

رووحانی وێڕای ئەوەی چەندین جار لە گوتەکانیدا ئەمریکای بە هاندان و پشتگیریکردن لە تیرۆریزم لە جیهاندا تۆمەتبار کرد، گوتی ”بزانن لە ئەمڕۆوە خۆشەویستیی سوپای پاسداران لە ئێران و لە ناوچەکە و لە جیهان لە هەمیشە زیاتر دەبێ و ئەگەر دەتانەوێ بەم بڕیارە لە نێوخۆی ئێرانیشدا دووبەرەکی بنێنەوە، ئەوە هەمووان بینییان چۆن لە یارمەتیی لێقەوماوانی لافاوەکانی ئەم رۆژانەی دواییدا هەموو هێزەکانی نێو ئێران شانبەشان و پێکەوە هاوکاری دەکەن”.

رووحانی هەروەها جەختی لەوەکردەوە، کە سەرەڕای گەمارۆکانی ئەمریکا پێشکەوتنی تەکنەلۆژیای ئەتۆمیی ئێران بەردەوامە و گوتی ”ئێستا سەنتریفیوژنەکانی ئێمە باشتر و خێراتر و بە کوالیتیی بەرزتر لە جاران دەسووڕێنەوە”.

دۆناڵد ترەمپ، سەرۆکی ئەمریکا رایگەیاند بوو، ئیدارەکەی ئامادەکاریی کردووە بۆ ناساندنی سوپای پاسدارانی کۆماری ئیسلامیی ئێران وەک “رێکخراوێکی تیرۆریستیی بیانی”. 

هاوکات، لە کۆنگرەیەکی رۆژنامەڤانیدا، مایک پۆمپیۆ، وەزیری دەرەوەی ئەمریکا هۆشداریدایە هەموو بانک و کۆمپانیان و بازرگانان کە کۆتایی بە کارکردنیان لەگەڵ سوپای پاسداران بهێنن.

ئەم ئامادەکارییانە بە بەشێک لەو گۆڕانکارییانە دادەنرێت کە ئەمریکا لە سیاسەتی خۆی لە رۆژهەڵاتی نێوەڕاست ئەنجامی دەدات و هاوکات چاوەڕێدەکرێت بەرئەنجام و لێکەوتەی فراوان بەدوای خۆیدا بهێنێت و کاریگەریی لەسەر ستاف و سەربازانی ئەمریکا لە رۆژهەڵاتی نێوەڕاست و ناوچەکانی دیکە هەبێت. 

لەبارەی ئەو بڕیارەی ئەمریکا، ئەنجوومەنی باڵای ئاسایشی نیشتمانیی ئێران بەتووندی ئیدانەی بڕیارەکەی ئەمریکا لەبارەی سوپای پاسداران کرد و رایگەیاند ”ئیدارەی ئەمریکا وەک پاڵپشتیکاری تیرۆر دەناسێنین و هەموو ئەو هێزانەی سەر بە سەنتکامن لە لیستی تیرۆری ئێمەدان”.

سه‌رچاوه‌

وه‌ڵام دانه‌وه‌

Please enter your comment!
Please enter your name here