شەش حیزبی رۆژهەڵاتی کوردستان بایکۆتی هەڵبژاردنەکانی ئێران دەکەن

0
354

داوا لە خەڵک دەکەن بەشداری نەکەن

رووداو – سلێمانی

شەش حیزبی رۆژهەڵاتی کوردستان داوا لە هاونیشتمانییانی رۆژهەڵاتی کوردستان دەکەن بایکۆتی هەڵبژاردن بکەن و بەشداری لە پرۆسەی دەنگدان بۆ هەڵبژاردنی سەرۆکایەتی ئێران و هەڵبژاردنی شوراکانی شار و دێ نەکەن، کە بڕیارە رۆژی 19ی مانگی داهاتوو بەڕێوەبچێت.

ئەمڕۆ (27-4-2017)شەش پارتی رۆژهەڵاتی کوردستان لەسەر بۆچوونی هاوبەش لەبارەی هەڵبژاردنەکانی ئێران لە سلێمانی کۆبوونەوە. 

دوای کۆبوونەوەکە ئیبراهیم عەلیزادە، سکرتێری کۆمەڵە-رێکخراوی کوردستانی حیزبی کۆمۆنیستی ئێران، لە کۆنگرەیەکی رۆژنامەڤانیدا ئەو راگەیێندراوە هاوبەشەی خوێندەوە کە هەر شەش حیزبەکەی لەسەر رێککەوتن و هەڵوێستی خۆیان لەبارەی هەڵبژاردنەکانی داهاتووی ئێران ئاشکراکرد و، داوایان لە هاونیشتمانییانی رۆژهەڵاتی کوردستان کرد بەشداری هەڵبژاردنەکان نەکەن.

دەقی راگەیێندراوی شەش حیزبەکەی رۆژهەڵاتی کوردستان

کۆمەڵانی تێکۆشەری خەڵکی کوردستان

کۆماری ئیسلامی ئێران، رۆژی 29ی بانەمەڕی ئەمساڵ هەڵبژاردنی سەرۆککۆماری و شوراکانی شار و دێ بەڕێوەدەبات، ئەوەی بەناوی هەڵبژاردن لەو رۆژەدا لەژێر دەسەڵاتی کۆماری ئیسلامی ئێران بەڕێوە دەچێت بە هیچ پێوەرێکی دیموکراتیک ئەوڕۆیی ناتوانرێت ناوی هەڵبژاردنی ئازادی لەسەر بێت، لە بارودۆخێکدا کە حیزبە سیاسییەکانی نەیاری رژێم قەدەخەکراون، رادەربڕینی رای ئازاد تاوانەو کۆمەڵانی خەڵکی کوردستان لە سەرەتاییرین مافی نەتەوایەتی و ئینسانی خۆیان بێبەشکراون، ئەو بەناو هەڵبژاردنە بە واتای بێ مافکردنی کۆمەڵانی خەڵک لە دیاریکردنی چارەنووسی خۆیانە و یەکێک لە هۆکارەکانی درێژکردنەوەی تەمەنی کۆماری ئیسلامی و نیزامی سەرەڕۆ و داپڵۆسێنەرە لە ئێران.

بەم بۆنەوە داوا لە هەموو خەڵکی کوردستانی رۆژهەڵات دەکەین وەکو کاردانەوەیەکی لێبڕاوانە، بەرامەبەر بەو هەموو بێ مافییە لە هەڵبژاردنەکانی رۆژی 29ی بانەمەڕدا بەشداری نەکەن، بە بەشداری نەکردنی خۆتان لەم شانۆگەرییە پەیامێکی روون لە ئیرادەو یەکدەنگی خۆتان بەرامبەر بە رژێمێک کە مافە ئینسانی و رەواکانی ئێوە پێشێل دەکات، بە جیهان رابگەیێنن.

بایکۆتکردنی یەکدەنگی ئەو بەناو هەڵبژاردنە، لە هەمانکاتدا رێگایەکە بۆ پێشگرتن لە داسەپاندنی هەر چەشنە فشارو سەرکوتێک بەبۆنەی هەڵبژاردنەوە.

داوا لە هەموو چالاکانی بواری خەباتی کۆمەڵایەتی و مەدەنی، تێکۆشەرانی سیاسی، لایەن و کەسایەتییە سیاسییەکان دەکەین، کە لە پێناوی بەجێهێنای ئەرکی ئازادیخوازانەی خۆیان، هەڵسوراوانە بەدەم ئەم بانگەوازەوە بێن ریزەکانی ئەم یەکدەنگییە بەهێزتر بکەن.

-حیزبی دیموکراتی کوردستان
-کۆمەڵەی زەحمەتکێشانی کوردستان
-کۆمەڵەی شۆڕشگێڕ زەحمەتکێشانی کوردستانی ئێران
-سازمانی خەباتی کوردستانی ئێران
-حیزبی دیموکراتی کوردستانی ئێران
-کۆمەڵە رێکخراوی کوردستانی حیزبی کۆمۆنیستی ئێران

7ی بانەمەڕی 1396
27-4-2017

سه‌رچاوه‌

وه‌ڵام دانه‌وه‌

Please enter your comment!
Please enter your name here