كچێكی كورد دەبێتە یەكەمین فڕۆكەوان لە كوردستان و عێراق

0
158

وەرتێ ئەبوبەكر عەلی
وەرتێ ئەبوبەكر عەلی

رووداو – هەولێر

لەگەڵ دەنگی تانك و فڕۆكە و بۆردومانی شارەكانی كوردستان لەلایەن رژێمی بەعسەوە هاتە دونیاوە، بەڵام ئێستا بووەتە یەكەم كچە كورد كە فڕۆكە لێبخوڕێ‌. 

وەرتێ ئەبوبەكر عەلی، 26 ساڵ، لەگەڕەكی كانێسكانی شاری سلێمانی لەخێزانێكی ناوداری شارەكە لەدایك بووە و 23 ساڵیشە لە دانیمارك دەژی، لەوێ توانیویەتی خوێندن لەبواری فڕۆكەوانی شارستانی تەواو بكات.

وەرتێ‌ لەكاتی كۆڕەوەكەی 1991 لەدایك بووە ئەوكاتەی خێزانەكەی ئاوارەی ناوچەی وەرتێ‌ ببوون. ئەو لەبارەی ناوەكەی دەڵێت “دڵسۆزیی خەڵكی وەرتێ بەتایبەت پیرەژنێك كە نانی پێداوین، سەرنجی دایكم و باوكمی راكێشاوە، بۆیە ناویان ناوم وەرتێ‌”.

گوتیشی “ناوەكەی خۆمم زۆر پێخۆشە و خەڵك زۆر پرسیاری ناوەكەم دەكەن و پێیان جیاوازە”.

باوكی وەرتێ پێشمەرگەیە و كاتێك تەمەنی وەرتێ دەبێتە ساڵێك، بەهۆی بارودۆخی خراپی ئەوكات كوردستان بەجێدەهێڵن و لە دانیمارك نیشتەجێ دەبن. خولیای فڕۆكەوانی هەر لە منداڵییەوە دەچێتە سەری وەرتێ. خۆی دەڵێت “منداڵ بووم كاتێك مامۆستا لێی دەپرسیم خولیات چییە؟ دەمگوت فڕۆكەوانی، زۆر حەزم لە فڕین بوو، بەردەوام وێنەی ئاسمانم دەكێشا”.

خێزانی وەرتێ بڕیاری گەڕانەوە بۆ كوردستان دەدەن، بەڵام وەرتێ هەر لە دانیمارك دەمێنێتەوە “ماڵی دایكم گەڕانەوە كوردستان و بەتەنیا لە دانیمارك درێژەم بە خوێندن دا، تا هەلی ئەوەم بۆ رەخسا لە كۆلێژی پەروەردەی فڕۆكەوانی لە كۆپنهاگن بخوێنم، بەڵام خوێندنەكەم بۆ فڕۆكەی بچووك بوو نەوەك گەورە، زۆریش هەوڵم دا و شەونخونیم كرد تا ئامانجەكەم بهێنمەدی”. دەشڵێت “لە دانیمارك تەنیا فڕۆكەی بچووكم لێخوڕیوە، خولیای ئەوەم هەبوو بە فڕۆكەی گەورە بە ئاسمانی شارەكانی بەغدا و هەولێر و سلێمانیدا بفڕم، بۆیە گەڕامەوە كوردستان”.

وەرتێ دوو ساڵ لەمەوبەر، خوێندنی لەكۆلێژی هێڵی ئاسمانی فڕۆكەوانی دانیماركی (Copenhagen Airtaxi College of airline pilot Education Denmark) تەواو كردووە، دواتر بەدوای كاردا گەڕاوە بەڵام لە كوردستان هەلی كاری بۆ نەڕەخساوە، بۆیە چووەتە بەغدا.

وەرتێ گوتی “زۆر حەزم كرد لە كۆمپانیایەكی فڕۆكەوانی لە كورستان دابمەزرێم، بەڵام كەسیان نەویست و كەسیش پێشنیازی كاری بۆ نەكردم. دواتر هەلی كارم لە بەغدا بۆ رەخسا لە كۆمپانیای Iraqi Ariways  ماوەی چەند مانگێكی خایاند تاوەكوو كاروباری دامەزراندن تەواو بوو، ماوەی ساڵێكە دامەزراوم، لەگەڵ كوڕێك بەناوی عەلی كە عەرەب بوو، نێردراین بۆ كۆرسی لێخوڕینی فڕۆكەی گەورە لە دوبەی، ماوەی 50 رۆژ وانەمان خوێند، زۆر هەوڵمان دا تا بە پلەی زۆر باشە توانیمان بگەڕێینەوە بەغدا”.

وەرتێ یەكەم گەشتی ئاسمانی بە فڕۆكەی گەورە بەرەو قاهیرە ئەنجام دەدات “لە 5/11 یەكەمین گەشتی ئاسمانیم بە فڕۆكەی گەورە دەستی پێكرد، بە پانتۆڵێكی شین و كراسێكی سپی و بۆینباخێكی شینی تۆخ و كەمێك ماكیاژی سادە، بە 145 سەرنشینەوە بۆ قاهیرە فڕیم، سوپاس بۆ خوا یەكەم گەشتم بە سەركەوتوویی ئەنجامدا، بەهۆی كەشوهەواوە چوونمان سێ كاژێر و پێنج خولەكی خایاند، بەڵام لە هاتنەوەمدا بە دوو كاژێر و پێنج خولەك گەیشتینەوە”.

ئەمڕۆ دووشەممە، وەرتێ ئەبوبەكر دووەم گەشتی بە فڕۆكەی گەورە دەكات “ئەمڕۆ گەشتی دووەمم دەستپێدەكات بۆ دوبەی و زۆربەی كەناڵە عەرەبییەكان لە فڕۆكەخانە ئامادە دەبن”. وەرتێ وەك یەكەمین كچە كورد لەسەر ئاستی عێراق و كوردستان توانی ببێت بە فڕۆكەوان. ئەو دەڵێت “دەخوازم كچان چاوم لێبكەن و هەوڵ بدەن، چونكە هیچ شتێك مەحاڵ نییە”.

سه‌رچاوه‌

وه‌ڵام دانه‌وه‌

Please enter your comment!
Please enter your name here