لە سلێمانی 424 منداڵ لەسەر شەقامەكانن

0
229

پۆلیسی رێككاری لە هەولێر: 1300 سواڵكەر و دەستگێڕمان دەستگیر كردووە
پۆلیسی رێككاری لە هەولێر: 1300 سواڵكەر و دەستگێڕمان دەستگیر كردووە

رووداو- هەولێر

دوو منداڵی خەڵكی رۆژئاوای كوردستان لەسەر شەقامی سالم لە سلێمانی ماسیحەیەكی بچووكیان بەدەستەوەیە و خەریكی سڕینەوەی جامی ئۆتۆمبێلەكانن، جارجارە ماسیحەیەك و تۆزێ كەفاو دەهێنن بە جامی ئۆتۆمبێلەكاندا، یان تێر جوێن دەكرێن یان پشتگوێ‌ دەخرێن، ئەوان سواڵ دەكەن، بەڵام بەشێوازێكی دیكە.

ئەحمەد كە یەكێكە لەو دوو منداڵە، دەڵێت “دوو برا و باوكم لە تەقینەوەدا شەهید بوون، لەگەڵ دایكم و دوو خوشكم ماوینەتەوە و هەموومان كار دەكەین، ئەوان كلێنكس دەفرۆشن، منیش كاری خاوێنكردنەوە دەكەم، رۆژانە نزیكەی پێنج هەزار دینارم دەستدەكەوێت، بەڵام  شوفێرەكان جنێومان پێدەدەن”.

رێكخراوی منداڵپارێزی كوردستان پڕۆژەیەكی بۆ كۆكردنەوەی ئەو منداڵانە لە شوێنێكی باشتر و بۆ دابینكردنی ژیانێكی باشتر هەیە. 

بەپێی رووپێوییەكی ئەو رێكخراوە كە ساڵی رابردوو لە سلێمانی كراوە، 424 منداڵ كە تەمەنیان لە خوار 15 ساڵانەوەیە، سواڵ دەكەن.

نەوڕەس ئەحمەد مەحموود، بەڕێوەبەری پەیوەندییەكانی رێكخراوی مناڵپارێزی كوردستان بە (رووداو)ی گوت “بە پێویستمان زانی جێگەیەك بۆ منداڵە بێكەسەكان و ئەو منداڵانەی خێزانەكانیان نایانگرنەخۆ دابین بكرێت، ئەویش بە داواكردن لە خانەی چاودێریی منداڵانی سلێمانی كە شوێنێكی جیایان هەبوو، بەڵام پێویستی بە چاككردن بوو، داوایەكمان پێشكەش كرد بە دابینكردنی بوجەیەك، بەڵام بەهۆی نەبوونی بودجەوە وەڵاممان نەدرایەوە، بۆیە ئەمساڵ قایمقامی سلێمانی خۆی بانگی كردین بۆ پرۆژەكەمان”.

ئێستا پرۆژەكە ناونراوە (سنوورداركردنی كاركردن و سواڵكردنی منداڵانی خوار تەمەن 15 ساڵ) بودجەشی بۆ تەرخانكراوە. نەوڕەس دەڵێت: “ئەو بودجەیە بۆ نۆژەنكردنەوەی بیناكەیە كە سەر بە خانەی چاودێریی كۆمەڵایەتی كوڕان و كچانە، چونكە ئەم منداڵانە كەیسەكانیان جیاوازە و نابێ‌ تێكەڵ بە منداڵانی دیكەی خانەكە بكرێن”.

ستافێك بۆ خانەكە دابین دەكرێت كە لە دوو تیمی گەڕۆك پێكهاتووە، تیمی توێژەری كۆمەڵایەتی و تیمی پۆلیسی نەوجەوانان. نەوڕەس دەڵێت “پێویستە بە شەو و رۆژ ئەم دوو تیمە چاودێری منداڵان بكەن، تیمی پۆلیسی نەوجەوانان دەبێت بە جلی مەدەنی و ئۆتۆمبێلی مەدەنی بێت و لەكاتی سواڵ و كاركردن و ئەم منداڵانە ببەنە خانەی تێبینی لە پۆلیسی نەوجەوانان، تاوەكو بانگی خێزانەكەی دەكرێت و لەلایەن دادوەر بەڵێننامەیان پێ پڕدەكرێتەوە، ئەگەر بۆ جاری دووەم منداڵەكەی ناردە سەرشەقام ئەوكات سزادەدرێن”.

سەبارەت بەو منداڵانەی خێزانیان نییە یاخود نایانگرنە خۆیان و كێشەی خێزانییان هەیە، نەوڕەس ئەحمەد دەڵێت “لەو خانەیە لەژێر چاودێری توێژەرانی پسپۆر بەخێویان دەكەین و تاوەكو ئێستاش نزیكەی 10 منداڵمان هەن”.

بەڕێوەبەری پەیوەندییەكانی رێكخراوی مناڵپارێزی كوردستان دەڵێت “93.3%ی ئەم منداڵانەی سواڵ یان كار دەكەن لەچوارچێوەی خێزاندان ، ئەوەی جێگەی داخە زۆربەیان لە خوێندن دابڕاون و لەسەر شەقامەكانن، 41%ـیان توندوتیژی فیزیكییان بەرامبەر دەكرێت و 21%ـشیان توندوتیژی سێكسی و سوكایەتیان پێدەكرێت”.

كەمالی تەمەن 12 ساڵان و بەدیعەی تەمەن 7 ساڵان دوو خوشك و بران كە ماوەی دوو رۆژ لەگەڵ خوشك و براكەی دیكەیان و 4 منداڵی دیكەی رۆژئاوای كوردستان لەسەر شەقامەكانی شاری هەولێر مابوونەوە و شەوانەش هەموویان لەژێر یەك بەتانی دەخەوتن لەسەر شەقامەكان، كەمال دەڵێت: “ئێمە 8 منداڵ بووین، لەبەرئەوەی پارەمان كۆنەكردبووەوە، لە ترسی دایك و باوكمان نەمانوێرا بچینەوە ماڵەوە، بە هەموومان یەك بەتانیمان پێبوو، شەوان زۆر سارد بوو”.

بەدیعە و كەمال چەند جارێك لەلایەن پۆلیسەوە دەستگیركراون “زۆرجار ئێمەیان گرتووە، دەڵێن دەبێت بچنەوە ماڵەوە، بەڵام باوك و دایكمان دەڵێن دەبێت پارە پەیدا بكەن”. كەمال دەشڵێت “لە هەولێر و بەغدا و كەركووكیش سواڵم كردووە و كلێنكس و ئاوم فرۆشتووە، بەڵام زۆرترین كات هەر لە هەولێر كردوومە، چونكە ئیشكردن لە هەولێر باشترە و پارەی زیاترمان دەستدەكەوێت، رۆژانە لەگەڵ هەرسێ خوشك و براكەم 50 بۆ 55 هەزار دینارمان دەستدەكەوێت”.

لە هەولێر زیاتر لە ساڵێكە پلانی نەهێشتنی سواڵكردن دانراوە و بەردەوامە لە كارەكانی. رائید نەبەز عەبدولقادر، بەڕێوەبەری پۆلیسی رێككاری هەولێر بە (رووداو)ی گوت “لە 16/3/2016ـەوە هەڵمەتێكمان بۆ نەهێشتنی دیاردەی سواڵكردن و دەستگیركردنی ئەو كەسانە دەستپێكردووە و هەڵمەتەكەش بەردەوام دەبێت تا ئەم دیاردەیە بنبڕ دەكرێت، لەو ماوەیەشدا نزیكەی 1300 سواڵكەر و دەستگێڕمان دەستگیر كردووە كە منداڵ و پیاو و ئافرەتیشیان تێدایە، پەڕاوی لێكۆڵینەوەمان بۆ رێكخستوون و رەوانەی لای بەڕێز دادوەرمان كردوون، لەوێش بەڵێننامە لە دایك و باوكی ئەو منداڵانە وەردەگیرێت و دواتر ئازاد دەكرێن”.

بەشێك لەو منداڵانە هۆكاری سواڵكردنیان بۆ ئەوە دەگەڕێننەوە كە دایك و باوكیان نەخۆشن و توانای كاركردنیان نییە، بەڵام بەڕێوەبەری پۆلیسی رێككاری لە هەولێر دەڵێت “دوای ئەوەی بانگی كەسوكارەكانیانمان كردووە، دەركەوتووە هیچ كێشەیەكیان نییە، بەڵام لەبەرئەوەی پیشەیانە، بەردەوام كار بەو منداڵانە دەكەن”.

سه‌رچاوه‌

وه‌ڵام دانه‌وه‌

Please enter your comment!
Please enter your name here