لە هەڵبژاردنەکانی رابردووی عێراق "ئێرانی و ئەفغانی دەنگیان داوە"

0
608

پرۆسەی لێپرسینەوە لە کۆمیسیۆنی باڵای هەڵبژاردنەکانی عێراق لە پەرلەمانی عێراق بەردەوامە

رووداو – بەغدا

پرۆسەی لێپرسینەوە لە کۆمیسیۆنی باڵای هەڵبژاردنەکانی عێراق لە کۆبوونەوەی پەرلەمان بەردەوامە. تاوەکو ئێستا چەندین دۆسیە هەڵدراونەتەوە و بابەتی هەستیار ئاشکراکراون.

پەرلەمانتارێکی کورد دەڵێت، پرسیارەکان ئاراستەی خودی سەرۆکی کۆمیسیۆن نەکراون، بەڵکو “مەبەستیان لەو سیاسەتەی مالیکییە کە لە کۆمسیۆنی باڵای هەڵبژاردنەکانی عێراق هەبووە و هەیە”.

بەهمەن حەسەن، پەیامنێری تۆڕی میدیایی رووداو لە بەغدا دەڵێت، کۆبوونەوەی پەرلەمانی عێراق بە ئامادەبوونی سەربەست مستەفا، سەرۆکی کۆمیسیۆنی باڵای هەڵبژاردنەکان بەردەوامە و تاوەکو ئێستا لە کۆی 17 پرسیار 11 پرسیاری ئاراستە کراوە.

پەیامنێری رووداو دەڵێت، ئەو بەڵگە و دۆکیۆمێنتانەی لەسەر دەستەی کۆمسیۆنی هەڵبژاردنەکان هەن بابەتی زۆر هەستیار ئاشکراکراون، لەوانە دەرکردنی ناسنامەی ساختە بۆ هەزاران بیانی، کە مافی دەنگدانیان لە هەڵبژاردنەکان هەبووە، هەندێک زانیاریش ئاشکرابووە کە ئەو کەسانە ئێرانین و لە سەردەمی مالیکیدا ناسنامەی عێراقی-یان بۆ دەرکراوە، لەنێوان ئەو ئێرانی-یانەش گومان دەکرێت ئەفغانی نیشتەجێی ئێرانی تێدابێت، وەک چۆن ساڵانە بە هەزاران ئەفغانی بەبێ هەبوونی پاسپۆرت لە بۆنە ئایینییەکان دێنە عێراق.

پەیامنێری رووداو دەشڵێت: هەر بەپێی بەڵگەکان هەر ئەندامێکی کۆمیسیۆن نزیکەی نۆ ملیۆن دیناری وەکو پاداشت وەرگرتووە، جیا لەوە چەندین دۆسیەی دیکە هەڵدراونەتەوە، ئەگەر بێت ئەو دۆسیانە لە دادگای فیدراڵی کاریان لەسەر بکرێت، بە تایبەت ئەوانەی دەستیان تێدا هەبووە بەر لە دوورخستەنەوەیان سزای یاسایی بدرێن، بە تایبەتیش لەسەر ئەوانەی ناسنامەی ساختەیان بۆ بیانییەکان دەرکردووە.

نەدا عەنتەر، پەرلەمانتاری کورد لە پەرلەمانی عێراق لەسەر پرۆسەی لێپرسینەوەکە لە (تۆڕی میدیایی رووداو)ی رایگەیاند “هیوادارین پرۆسەی لێپرسینەوەکە پرۆسەیەکی سیاسی نەبێت، بەڵام بە ئاماژەدان بەو پرسیارانەی کە ماجدە تەمیمی، کەسی پرسیارکەر ئاراستەی سەرۆکی کۆمیسیۆنی باڵای هەڵبژاردنەکانی عێراقی کردووە، پرسیارەکان پرسیاری کەسی نین و ئاراستەنین بۆ خودی سەربەست مستەفا، بەڵکو مەبەستیان لەو سیاسەتەی مالیکییە لە کۆمسیۆنی باڵای هەڵبژاردنەکانی عێراق هەبووە و هەیە. بۆیە ئەوان زیاتر مەترسییان لەوە هەیە نەوەک جارێکی دیکە لە هەڵبژاردنی داهاتووی عێراق ئەم دەستەیە ئیشی خۆی بکات و کاریگەری بەسەر کۆمیسیۆن هەبێت”.

نەدا عەنتەر دەڵێت: “هەر لە دەستپێکی پرسیارەکان پەرلەمانتار ماجیدە تەمیمی، ئەندامی فراکسیۆنی ئەحرار گوتی، من لێپرسینەوەکەم بۆ خودی سەربەست مستەفا نییە، بەڵام بە سیفەتی ئەوەی سەرۆکی کۆمیسیۆنەکەیە پرسیارەکانی ئاراستەی ئەو دەکرێت، سەرۆکی کۆمیسیۆنیش بەپێی بەڵگە و دۆکیۆمێنت وەڵامی هەموو پرسیارەکانی داوەتەوە”.

داڕشتنەوە: حەکیم داود

سه‌رچاوه‌

وه‌ڵام دانه‌وه‌

Please enter your comment!
Please enter your name here