لە پەرلەمانی عێراق باسی پەرلەمانی كوردستان دەكرێت

0
176

بەهمەن حەسەن، پەیامنێری رووداو لە بەغدا باسی کۆبوونەوەی ئەمڕۆی پەرلەمانی عیراق دەکات

رووداو – بەغدا

لەسەر پێشنیازی پەرلەمانتارێكی بزووتنەوەی گۆڕان، تەوەرێكی دانیشتنی پەرلەمانی عێراق بۆ باسكردنی پەكخرانی پەرلەمانی كوردستان تەرخاندەكرێت. ئەو پەرلەمانتارەش دەڵێت “دوای نزیكەی 18 مانگ لە پەكخستنی كارەكانی پەرلەمانی كوردستان، پێویستە پەرلەمانی عێراق قسەیەكی هەبێت”.

رۆژی یەكشەممە 30-4-2017 پەرلەمانی عێراق کۆدەبێتەوە. دەستەی سەرۆکایەتی پەرلەمانیش لەسەر داوای ئەندامێکی فراکسیۆنی گۆڕان ئەنجامدانی گفتوگۆیەکی کراوەی لەبارەی هۆکار و گرفتەکانی بەردەم پەکخستنی پەرلەمانی کوردستان خستووەتە بەرنامەی کارەوە.

ئەمین بەكر، پەرلەمانتاری فراكسیۆنی گۆڕان لە پەرلەمانی عێراق بە (تۆڕی میدیایی رووداو)ی راگەیاند “پەكخستنی كارەكانی پەرلەمانی كوردستان پێچەوانەی دەستووری عێراق ‌و مەبدەئی دیموكراسییە، بۆیە پێویستە پەرلەمانی عێراق لەمبارەیەوە قسەیەكی هەبێت”.

بەهمەن حەسەن، پەیامنێری رووداو لە بەغدا رایگەیاند: ئەمڕۆ کۆبوونەوەی ئاسایی پەرلەمان بەڕێوەدەچێت کە درێژکراوەی کۆبوونەوەکەی دوێنێیە، ئەوەی پەیوەستبێت بە هەرێمی کوردستانەوە، ئەنجامدانی گفتوگۆیەکی کراوەیەوە لەبارەی هۆکار و گرفتەکانی بەردەم پەکخستنی پەرلەمانی کوردستان لەسەر داوای پەرلەمانتارێکی فراکسیۆنی گۆڕان.

پەیامنێری رووداو دەڵێت: باسکردنی ئەو بابەتە لە پەرلەمانی عێراق پێشتر لەلایەن فراکسیۆنی گۆڕانەوە ئامادەکاری بۆ کرابوو و گوشار خرابووە سەر دەستەی سەرۆکایەتیی پەرلەمان، دواجار خرایە بەرنامەی کاری ئەمڕۆی دانیشتنی پەرلەمان.

پەیامنێری رووداو دەشڵێت:  ناکۆکی و کێشەکانی پەیوەست بە هەرێمی کوردستان رەنگدانەوەیان لەنێو فراکسیۆنە کوردستانییەکان هەبووە، بۆیە لەسەر هەندێک بابەتی کەم نەبێت کۆدەنگی دروست نابێت، لەسەر ئەم بابەتەش کۆدەنگی نییە، ئەوە نەبێت لەلایەن فراکسیۆنی گۆڕان ئەم بابەتە وروژێنراوە و هەندێ لە فراکسیۆنەکانی سەر بە رەوتەکەی نووری مالیکی و چەند لایەنی دیکە پشتگیریی خۆیان پیشانداوە، بەتایبەت لە حاڵەتی دەرکردنی هەر جۆرە بڕیارێک.

لە سەرەتای مانگی 10ی ساڵی 2015، دژی بێئەنجامی کۆبوونەوە پێنجقۆڵییەکان لەبارەی هەمووارکردنەوەی دەستوور، پۆستی سەرۆکی هەرێمی کوردستان و خراپی رەوشی هەرێمی کوردستان، خۆپیشاندان ‌و ئاڵۆزی لە سنووری پارێزگای سلێمانی دروستبوو، لە چەند شوێنێک خۆپیشاندەران هێرشیان کردە سەر  بارەگاکانی پارتی و ‌سووتاندنیان، ئەم ئاڵۆزییەش کوژراو و برینداری لێکەوتەوە.

پارتی، بزووتنەوەی گۆڕانی بەوە تۆمەتباركرد دەستی لەو خۆپیشاندانانەدا هەبووبێت، بەمەش پەیوەندییەكانی ئەو دوو حیزبە گرژییان تێكەوت، سەرەنجام پارتی لە 12-10-2015 لە بازگەی پردێ رێگری لە د.یوسف محەممەد، سەرۆكی پەرلەمان كرد بگەڕێتەوە هەولێر، لەو كاتەشەوە پەرلەمان پەکخراوە. هەروەها وەزیرەکانی گۆڕانیشی لە حکومەت دوورخستنەوە.

پێداچوونەوە: دەرباز ساڵح

سه‌رچاوه‌

وه‌ڵام دانه‌وه‌

Please enter your comment!
Please enter your name here