مەسروور بارزانی: پەکەکە هۆکاری پەلکێشکردنی تورکیایە بۆ هەرێمی کوردستان

0
455

مەسروور بارزانی، راوێژکاری ئەنجوومەنی ئاسایشی هەرێمی کوردستان
مەسروور بارزانی، راوێژکاری ئەنجوومەنی ئاسایشی هەرێمی کوردستان

رووداو – نیویۆرک تایمز
 
راوێژکاری ئەنجوومەنی ئاسایشی هەرێمی کوردستان رایدەگەیێنێ، بۆردوومانەکەی تورکیا بۆ سەر چیای شنگال چاوەڕواننەکراو بووە، بۆیە داوای روونکردنەوەیان لە تورکیا کردووە.

مەسروور بارزانی، راوێژکاری ئەنجوومەنی ئاسایشی هەرێمی کوردستان، لەبارەی بۆردوومانەکەی تورکیا بۆ سەر چیای شنگال بە رۆژنامەیەکی ئەمریکی راگەیاندووە: “بۆردوومانەکە بۆ ئێمە چاوەڕواننەکراو بوو”.

بارزانی باسی لەوە کردووە کە پێشتر تورکیا ناوچە سنوورییەکانی بۆردوومانکردووە، بەڵام ئەمە یەکەمجارە ئەو ناوچەیە بۆردوومان بکات. بەهۆی هێرشەکە شەش پێشمەرگە شەهید و ژمارەیەکیش بریندار بوون، لەمبارەیەوە مەسروور بارزانی رایگەیاندووە، داوایان لە تورکیا کردووە روونکردنەوەیان پێبدات، بەڵام تاوەکو ئێستا وەڵامیان نەداونەتەوە، هیوایشی خواستووە ئەمە هەڵەیەک بووبێت.

مەسروور بارزانی پەکەکەی بە هۆکاری ئەو هێرشە داناوە و رایگەیاندووە “پەکەکە هۆکاری هەموو ئەو کێشانەیە” . ئاماژەی بەوەش کردووە، هێرشەکان پەیوەندییان بەوەوە نییە کە ئەوان حەزدەکەن یان نا، بەڵکو ئەوە پەکەکەیە تورکیا بۆ ناوچەکە رادەکێشێت.

لەبارەی بۆردوومانەکە و بەرکەوتنی ژمارەیەک پێشمەرگە، رەجەب تەیب ئەردۆغان، سەرۆککۆماری تورکیا رایگەیاند: “ئەوەی لە شنگال روویدا بەهیچ شێوەیەک بەرامبەر پێشمەرگە نەبووە، ئێمەش بیستوومانە کە پێنج پێشمەرگە گیانیان لەدەستداوە، ئەمە ئەو شتە نەبوو کە ئێمە دەمانویست، بۆیە گیانلەدەستدانیان مایەی نیگەرانی ئێمەیە”.

بەرەبەیانی رۆژی سێشەممە 25-4-2017، چیای شنگال و چیای قەرەچووغ لەلایەن فڕۆکە جەنگییەکانی تورکیاوە بۆردوومانکران. بەپێی راگەیێندراوی وەزارەتی پێشمەرگە لەبارەی هێرشەکە، شەهیدبوونی پێنج پێشمەرگە و برینداربوونی نۆی دیکەی لێکەوتووەتەوە، دواتریش بریندارێکی دیکە شەهیدبووە. هەر بەهۆی هەمان هێرش شەڕڤانێکی سەر بە پەکەکە گیانی لەدەستدا و پێنجی دیکەش برینداربوون.

بۆردوومانەکەی چیای قەرەچووغیش لە رۆژئاوای کوردستان زیانی زۆری لێکەوتەوە. رێدوور خەلیل، گوتەبێژی یەپەگە رایگەیاند “لە ئەنجامی هێرشی فڕۆكە جەنگییەكانی توركیا 20 شەڕڤانمان شەهید و 18ی دیكەش برینداربوون”.
 
پێداچوونەوە: دەرباز ساڵح

سه‌رچاوه‌

وه‌ڵام دانه‌وه‌

Please enter your comment!
Please enter your name here