هەسەدە: لە پێنج ساڵدا زیاتر لە 11 هەزار شەهیدمان داوە

0
294

مەزڵووم عەبدی، فەرماندەی گشتی هێزەکانی سووریای دیموکرات - هەسەدە: شەڕمان دژی تیرۆری داعش بەردەوام دەبێت
مەزڵووم عەبدی، فەرماندەی گشتی هێزەکانی سووریای دیموکرات – هەسەدە: شەڕمان دژی تیرۆری داعش بەردەوام دەبێت

رووداو – باغۆز 

فەرماندەی گشتی هێزەکانی سووریای دیموکرات – هەسەدە رایگەیاند، لە ماوەی پێنج ساڵی شەڕی دژ بە داعش ”زیاتر لە 11 هەزار شەهیدمان لە هێزەکانمان لە فەرماندە و شەڕڤانەکان و هاووڵاتیانی سڤیل داوە، هەروەها 21 هەزار شەڕڤانی دیکەشمان برینداربوون”. 

مەزڵووم عەبدی، فەرماندەی گشتی هێزەکانی سووریای دیموکرات – هەسەدە، لە کاتی راگەیاندنی سەرکەوتنیان بەسەر داعش لە باغۆز رایگەیاند: “شانازی بەو دەستکەوتە دەکەین کە بەدیمانهێناوە لە ئەنجامی جەنگانمان دژ بە داعش و قاعیدە، توانیومان پێنج ملیۆن کەس لە باکوور و رۆژهەڵاتی سووریا لە دەستی تیرۆر رزگار بکەین بە سەرجەم پێکهاتەکانیانەوە، ئەویش بە ئازادکردنەوەی 52 هەزار کیلۆمەتر چوارگۆشە لە خاکی سووریا و نەهێشتنی مەترسی تیرۆر کە هەڕشەبوو بۆسەر مرۆڤایەتی”.

فەرماندەی گشتی هێزەکانی سووریای دیموکرات – هەسەدە سەبارەت بەو کەسانەی گیانیان لەدەستداوە و برینداربوون دەڵێت: “ئەم سەرکەوتنەش بێ قوربانیدان نەبوو، زیاتر لە 11 هەزار شەهید لە هێزەکانمان لە فەرماندە و شەڕڤانەکان، هاوکات قوربانیدانی هاووڵاتیان سڤیل، کە ئامانجی تیرۆریستانی داعش بوو، هاوکات 21 هەزار شەڕڤانی دیکەمان برینداربوون”.

دەقی قسەکانی مەزڵووم عەبدی، فەرماندەی گشتی هێزەکانی سووریای دیموکرات – هەسەدە

بەناوی فەرماندەی گشتی هێزەکانی سووریای دیموکرات و سەرجەم شەڕڤانان و سەرجەم هێزەکانی هاوپەیمانی کە هاوشانی ئێمە لە یەک خەندەق جەنگان، ئەمڕۆ لەنێوبردنی بەناو دەوڵەتی ئیسلامی و کۆتاییهاتنی لە دوایین مۆڵگەی لە ناوچەی باغۆز رادەگەیێنین، دوای ئەوەی هێزەکانمان شکستیان بە تیرۆریستانی رێکخراوی قاعیدە و پاشکۆکانی هێنا بەو ئیمکانیەتە خودییەی هەمانبوو لە رێگەی بەرخودان و قارەمانیەتی لە ساڵانی 2012 و 2013، جارێکی دیکە ناوچەکانمان لە سەرەتای ساڵی 2014 رووبەڕووی هێرشەکانی داعش بووەوە، کە لە هەموویان زیاتر وەحشیگەرتر و خوێناویتربوو، لە سەرجەم ناوچەکانمان، شەڕی کۆبانێ سیمبوولی بەرخودانی جیهانی بوو بەرامبەر بە تیرۆر و شکستهێنان بە داعش، ئەمڕۆش دوای پێنج ساڵ لە بەردەوامی شەڕ لێرە وەستاوین بۆ ئەوەی شکستی مەیدانی داعش و تەحەدیاتەکانی بۆ هەموو مرۆڤایەتی رابگەیێنین.

شانازی بەو دەستکەوتە دەکەین کە بەدیمانهێناوە لە ئەنجامی جەنگانمان دژ بە داعش و قاعیدە، توانیومان پێنج ملیۆن کەس لە باکوور و رۆژهەڵاتی سووریا لە دەستی تیرۆر رزگار بکەین بە سەرجەم پێکهاتەکانیانەوە، ئەویش بە ئازادکردنەوەی 52 هەزار کیلۆمەتر چوارگۆشە لە خاکی سووریا و نەهێشتنی مەترسی تیرۆر کە هەڕشەبوو بۆسەر مرۆڤایەتی.

ئەم سەرکەوتنەش بێ قوربانیدان نەبوو، زیاتر لە 11 هەزار شەهید لە هێزەکانمان لە فەرماندە و شەڕڤانەکان، هاوکات قوربانیدانی هاووڵاتیان سڤیل، کە ئامانجی تیرۆریستانی داعش بوو، هاوکات 21 هەزار شەڕڤانی دیکەمان برینداربوون.

بەو بۆنەیەوە سەری رێز و نەوازش بۆ شەهیدان دادەنوێنین و هیوای زوو چاکبوونەوەش بۆ بریندارەکان دەخوازین، ئەگەر قوربانی ئەوان نەبووایە ئەو سەرکەوتنە بەدینەدەهات.

سوپاس و ستایشی هەر کەس و لایەنێک دەکەین کە بەشداربووە لەو شەڕەی دژی تیرۆر، لە سەرووی هەمووشیانەوە هاوپەیمانی نێودەوڵەتی دژی داعش، هۆکارێکی سەرەکی لە سەرکەوتنی هێزەکانی سووریای دیموکرات لە شەڕی دژی تیرۆر، پشتبەستنبوونبوو بە بەرنامەیەکی دیموکراتی و پرەنسیپی دیموکراتی و ئازادی ژنان و پرەنسیپی پێکەوەژیانی هاوبەش و برایەتی گەلان، کە شەڕەڤانە کورد و عەرەب و سریان و ئاشوور و تورکمان و شیشان و شەرکەس و نەتەوەییەکانی دیکەی لەژێر ئاڵای هێزەکانی سووریای دیموکرات کۆکردبووەوە.

هێزەکانی سووریا دیموکرات یارمەتی خەڵکی ناوچە ئازادکراوەکانیان داوە بۆ بونیادنانی دامەزراوە ئیداری و ئەمنییەکانیان، هاوکات دەرفەتێکی گونجاویش دەڕەخسێنێت بۆ ئەوەی ئەو ناوچانە سەرلەنوێ ئەنجوومەنی ئیداری و یاسایی خۆیان بونیادبنێنەوە لە رێگەی هەڵبژاردنێکی دیموکرات و شەفاف.

لە کۆتاییدا جەخت لەسەر ئەوە دەکەینەوە کە شەڕمان دژی تیرۆری داعش بەردەوام دەبێت تاوەکو سەرکەوتنی یەکجارەکی بەدیدێت و بەشێوەیەکی گشتی لەنێو دەبرێت، لە هەمان کاتیشدا رای گشتی جیهان و هاوپەیمانانمان ئاگادار دەکەینەوە، کە ئێمە پێویستمان بە پاڵپشتی زیاتر هەیە بۆ دەستپێکردنی قۆناخێکی نوێ لە بەرەنگاربوونەوەی تیرۆری داعش لە رێگەی بەردەوامی هەڵمەتە سەربازی و ئەمنییە وردەکان بە هاوئاهەنگی لەگەڵ هێزەکانی هاوپەیمانی نێودەوڵەتی بە ئامانجی لەنێوبردنی تەواوەتی و بوونی سەربازی داعش کە خۆی دەبینێتەوە لە شانەی نوستوو، کە تاوەکو ئێستاش مەترسی گەورەن لەسەر ناوچەکەمان و جیهان بە گشتی.

داڕشتنەوە؛ راوچی حەسەن 

سه‌رچاوه‌

وه‌ڵام دانه‌وه‌

Please enter your comment!
Please enter your name here