هەلیکۆپتەرێکی سەربازیی ئێران لە رۆژئاوای ئەو وڵاتە کەوتەخوارەوە

0
291

هەلیکۆپتەرێکی سەربازیی ئێران، وێنە؛ میدیا ئێرانییەکان
هەلیکۆپتەرێکی سەربازیی ئێران، وێنە؛ میدیا ئێرانییەکان

رووداو – هەولێر 

لە ئەنجامی کەوتنەخوارەوەی هەلیکۆپتەرێکی سەربازیی ئێران لە ناوچە سنووریەکانی رۆژئاوای ئەو وڵاتە، فڕۆکەوانێک گیانیلەدەستداو، سێ کەسی دیکەش برینداربوون.

حوسێن عەلی موستەئجیران، فەرماندەی پۆلیسی ئاسمانی ئێران کە ئەرکی پاراستنی سنوورەکانیشی لەدەستە، رایگەیاند ”کەسێک لە فڕۆکەوانەکان گیانیلەدەستداوە و سێ کەسی دیکەش بریندارن و دۆخی تەندروستیان جێگیرە”. 

ئەو فەرماندە گوتی، هەلیکۆپتەرەکە بەهۆی ”کێشەی تەکنیکی” کەوتووەتەخوارەوە. 

رووداوەکە لەناوچە شاخاوییەکانی دالامپەر لە ورمێ روویداوە. 

محەممەد مەولایی، جێگری فەرماندەی پاسەوانی سنووری پارێزگای ورمێ بە میدیاکانی ئێرانی راگەیاند، ”کەوتنەخوارەوەی ئەو فڕۆکەیە پەیوەندی بە پرسی ئەمنییەوە نییە”. 

سەرچاوە خۆجێییەکان بە تۆڕی میدیایی رووداویان راگەیاند، ”چەند هەلیکۆپتەرێک بۆ شوێنی رووداوەکە بەڕێکراون و زیاتر لە 10 ئەمبوڵانسیش لەو ناوچەیە ئامادەکراون، بەڵام بەهۆی بەفری زۆر رێگەی زەمینی نییە بۆ گەیشتن بە شوێنی کەوتنەخواری هەلیکۆپتەرەکە”.

بەپێی هەواڵی ماڵپەڕی تەسنیم کە لە میدیا فەرمییەکانی ئێرانەوە وەریگرتووە، هەلیکۆپتەرەکە لە جۆری 214 بووە و لە کاژیر 11ی سەرلەبەیانی رۆژی چوارشەممە لە کاتی گواستنەوەی سەربازەکان لە ناوچەکە کەوتووەتەخوارەوە.

داڕشتنەوە؛ راوچی حەسەن 

سه‌رچاوه‌

وه‌ڵام دانه‌وه‌

Please enter your comment!
Please enter your name here